Loading...
Loading...

Transcript of Phone patch interview with Vice President Leni Robredo on Bombo Radyo-Cauayan

7 October 2017
Office of the Vice President
“Bombo Hanay Bigtime” on Bombo Radyo-Cauayan, Isabela
Q: Ma’am Vice President… Ma’am Leni Robredo, magandang umaga po. Sa Bombo Radyo po ulit ito.
VP LENI: Magandang umaga din, Bombo Bobby. Magandang umaga ulit sa mga nakikinig sa atin. Paumanhin lang, mahina iyong signal kanina. Ngayon parang mabuti-buti na.
Q: Okay, Ma’am, salamat naman po… Ma’am, gusto lang po namin kasing matanong kayo ng ilang katanungan. Gusto rin pong marinig ng ating mga kababayan na nakikinig dito sa radio show sa eastern part ng Cordillera through Bombo Radyo-Cauayan.
Una po, iyong sadya po ninyo sa bayan ng Villaverde, Nueva Vizcaya. Ma’am, ngayon po ba ay may pasisinayaan diyan na ospital, Ma’am?
VP LENI: Ah, dito iyon sa Solano.
Q: Ah, sa Solano na po, Ma’am…
VP LENI: Mayroong ii-inaugurate na hospital, iyong Salubris Medical Center. Iyon iyong pinunta ko. Kahapon ako nasa Villaverde.
Alam mo, Bombo Bobby, iyong Villaverde kahit napakaliit na bayan, multi-awarded iyon. Kilala na natin iyong bayan kasi katulad last week, nag-attend ako ng isang event kanina, iyong sa Synergeia Foundation, nakakuha iyong Villaverde noong Seal of Good Education Governance.
Kaya binisita natin sila kahapon. Binisita iyong local officials. Saka binisita iyong isang elementary school, kasi iyong elementary school na iyon, noong 2014, naging recipient ng library noong AHON Foundation, na kabahagi naman ako.
Kaya binisita natin sila. Bahagi ng programa ng aming opisina, umiikot talaga kami, nagkukuwento, nagbibigay ng mga libro. Mayroon kasi kami, Bombo Bobby, na programa sa opisina, iyong Angat Buhay, at bahagi ito noon.
Q: Opo, Ma’am. Ma’am, ilan po iyong naipamahagi niyong aklat o libro sa paaralan po?
VP LENI: Wala akong bilang, Bombo Bobby, pero 2014 pa ito. Parang iyong over the years nagre-replenish lang siya. Gaya kahapon, iyong binigay, puwera sa aklat, mga school supplies para sa kabataan, kasi partner natin iyong National Bookstore. At iniwan natin iyon—hindi naman tayo nagbigay nang isa-isa, pero iniwan lang natin doon sa paaralan.
Tapos nagkaroon ng parang kuwentuhang bayan para sa mga bata. Ito naman, Bombo Bobby, hindi lang sa Villaverde, pero sa buong Pilipinas. Mayroon tayong partners na local government units na pinupuntahan natin para sa mga ganitong okasyon.
Q: Opo, Ma’am. Talagang hindi ninyo nakakaligtaan, nakakalimutan, Vice President Leni, iyong karapatan ng ating mga mag-aaral. Bakit po?
VP LENI: Ito, Bombo Bobby, matagal nang adbokasiya, hindi lang sa akin, pero pati na din sa asawa ko. Sabi ko nga, awardee iyong Villaverde, iyong ating mayor, noong nakaraang linggo. Itong Synergeia Foundation, isa siyang foundation on education governance, na isa iyong asawa ko sa nagbuo. At noong kaniyang okasyon last week, nagkaroon ng National Education Summit, mayroong tatlong bayan dito sa Nueva Vizcaya na nag-participate. Isa na nga doon iyong Villaverde, at iyong Villaverde ang isa sa mga awardees.
Kaya iyong akin naman, Bombo Bobby, iyong mga ganito… Gaano man kaliit iyong bayan, basta nagpapakita ng mahusay na governance, ito iyong gusto nating bigyan ng atensyon, kasi kapag ganoon, lalong nabibigyan ng incentive na lalong pagbutihin iyong sarili. Kaya natutuwa tayo. Kahapon nga lang namin nalaman na hindi lang sa education mahusay iyong Villaverde, pero multi-awarded siya sa napakaraming… napakaraming larangan. Recently pala, naging awardee din siya sa DOH. Siya din iyong Hall of Fame na sa Seal of Local Good Governance. Nakakatuwa. Naging most child-friendly municipality.
Ito iyong hinahanap natin, Bombo Bobby, sa buong Pilipinas, iyong mga kahit na nahaharap sa kahirapan, parang nalalampasan ito dahil sa pagsisipag, dahil sa desisyon na pagbutihin talaga iyong bayan, pagbutihin talaga iyong lungsod.
Q: Opo… Ma’am, Vice President, Ma’am Leni, I believe na para matulungan pa natin ang nabanggit na bayan, pati na rin iyong Solano, kung saan po nandiyan kayo ngayon, ano naman po iyong mga hiniling nila sa inyo, sa inyong tanggapan, na maaaring maibigay sa kanila para mapaunlad pa, matulungan natin ang mga bayan na iyan? Vice President Leni Robredo, Ma’am?
VP LENI: Ito, actually, Bombo Bobby, wala silang hinihingi. Pero pinag-aaralan natin kung ano pa ang maitutulong natin. Pero mayroon kasi kaming programa, iyong sinasabi kong Angat Buhay, mayroon itong anim na parang pillars. Kabahagi doon iyong nutrition and food security, universal healthcare, education, rural development, women empowerment, saka housing. Ang nakita natin talagang puwedeng maitulong pagdating sa rural development, kasi maayos iyong… maayos iyong taniman sa inyo. Kahapon, sa Villaverde, tinanong namin si Mayor kung kumusta iyong ani, kumusta iyong crops na pinapatubo. Ang sabi niya, bumuti nang ‘di hamak ngayon dahil sa irrigation. Pero siya, iyong Villaverde, Bombo Sonny—ay, Bombo Bobby—malaki iyong IP community niya. Kaya iyon iyong tinitingnan natin na baka maraming tulong ang kailangan.
Halimbawa, marami siyang mountain barangays na hindi pa energized, kaya nakita natin, marami kaming partners na nagbibigay para sa solar energy. Gusto nating pabisitahin kasi baka puwedeng ma-energize sa pamamaraan ng solar power iyong mga barangay na hindi pa, kasi napakalaking bagay ito, hindi lang sa araw-araw na pagbuhay nila, pero pati na din sa hanapbuhay.
Kahapon—mayroong siyam na barangay iyong Villaverde—na-meet natin iyong mga kapitan. Parang lima… limang barangay iyong upland, apat lang iyong nasa baba. Kaya iyong nakikita natin iyong upland— Iyong nasa baba kasi medyo okay na sila, pero iyong nasa upland talaga iyong marami pang pangangailangan, so ito iyong partnership na hahanapin natin for Villaverde.
Kasi iyong pinakakonsepto naman ng Angat Buhay, Bombo Bobby, partnerships ito with the private sector, kasi iyong opisina namin wala namang pondo na sarili para sa pag-implement ng programs. Kaya iyong ginagawa namin kapag nagbibisita, tinitingnan kung ano iyong mga pangangailangan, at tinitingnan kung kaninong partner namin sila puwedeng i-match.
Q: Okay. Ma’am, Vice President, Ma’am Leni, maiba naman tayo. Iyong current issues tungkol… lalo na itong tungkol sa— Alam ko iyong mga ibinalita ninyo na totoong balita iyan, at iyan ang kailangan nating pagtuunan ng pansin, lalo na sa lalawigan ng Nueva Vizcaya…
May mga naglalabasan ngayon tungkol sa anti-fake news, at may isinusulong laban sa anti-fake news. Kung kayo po ang tatanungin bilang Pangalawang Pangulo ng ating bansa, sang-ayon po ba kayo dito, Ma’am Vice President Leni Robredo, Ma’am?
VP LENI: Ito, Bombo Bobby, nakakabahala ito. Hindi lang ito ngayon nangyari, pero parang kahit noong nakaraang taon, bago pa mag-eleksyon, grabe na talaga iyong proliferation ng fake news, at nababasa natin hindi lang iyon sa Pilipinas, kundi sa ibang bahagi pa ng mundo.
Kaya ito, parang one year na hinayaan lang na nandiyan siya… Ako mismo, Bombo Bobby, ilang beses nang naging biktima ng fake news, at napakahirap na… napakahirap na parang buksan iyong mata ng iba sa katotohanan, kasi kapag nabasa na, ang tendency talaga maniniwala.
Pero ngayon, parang nag-iiba ang panahon. Ito, natutuwa tayo. Ngayon, parang mas dumadami na iyong lumalaban. Gusto kong sabihin doon sa lumalaban, mas marami na iyong nag-aaksya ng panahon para i-correct iyong kamalian o kasinungalingan na nagpe-prevail.
Malaking tulong dito iyong traditional media gaya ninyo—mula sa radyo, nasa diyaryo, nasa TV. Iyong traditional media na talagang bound sila by rules of journalism, na iyong ethics talagang sinusunod. Tingin ko iyong ginagawa ngayon ng traditional media, malaking tulong sa taumbayan, kasi marami sa inyo na kayo na mismo ang nagko-correct ng kasinungalingan na nangyayari.
Kaya natutuwa tayo na nagkaroon na ng hearing sa Senado. Gustong sabihin, siniseryoso na natin na ito ay problema talaga, at problema siya dahil paminsan naaapektuhan iyong mindset ng tao. Iyong propaganda, hindi na natin alam kung alin iyong totoo, alin iyong hindi. Kaya ngayon tingin ko, important first step iyong hearing sa Senado, kasi parang sinasabi sa atin na pagtulung-tulungan na natin. Pagtulung-tulungan na natin na labanan iyong fake news, kasi in the end, tayo din iyong makikinabang kapag nilabanan talaga natin.
Q: Opo, Ma’am, lalo na iyong mga blogger blogger na iyan. Sinasabi nila hindi naman sila journalist, pero sana kung magbalita sila, iyong totoo na, kasi mukhang sila pa iyong mga nagbabalita ng hindi totoo sa ating mga kababayan.
Kaya sa tingin po ninyo, dapat din mapigilan itong mga blogger na ito, Vice President Leni?
VP LENI: Ito kasi… Ito kasi, Bombo Bobby, ang unfair dito is, halimbawa, kayo na nasa radyo, kayo hindi puwdeng basta-basta magsalita hanggang hindi ninyo vine-verify. Dahil kayo, bound kayo ng rules of journalism. Gustong sabihin, alam ninyo na nasa balikat ninyo iyong responsibilidad, na hindi kayo magsasabi ng kahit ano na hindi totoo.
Pero ito kasi, mayroon tayong mga bloggers na iresponsable, mayroong mga bloggers na dahil hindi sila bound by the same rules na nagba-bind sa inyo, parang tinitingnan nila na lisensya ito na kahit hindi totoo, kahit unverified, puwede nilang isulat.
At ito, unfair ito sa ating lahat. Hindi lang sa mga… sa mga traditional media na… Parang ang lumalabas ngayon, Bombo Bobby, parang ang nadi-discredit pa iyong traditional media. Nakikita natin—
Q: Tama iyon, Ma’am.
VP LENI: Nakikita natin iyong blogs na iyon, parang ang sinasabi, ang sinungaling pa iyong traditional media. Saka napakamali. Dahil tingin nila hindi sila bound sa rules gaya sa inyo, akala nila puwede nang sabihin kahit ano.
Iyong ninanais natin, Bombo Bobby, ito sanang mga congressional inquiry, magresulta sa— Kung magpapasa ng bagong batas, magpasa ng bagong batas, para itong mga ganito, nasa social media na mga bloggers, hindi… parang hindi abusuhin iyong freedom of speech.
Tayo naman, Bombo Bobby, ayaw natin na kinu-curtail itong karapatan ng bawat isa na magsalita. Pero alam naman natin na ang bawat karapatan, may kaakibat na responsibilidad, at iyong gusto lang natin… ang gusto lang natin, ipaintindi dito sa mga bloggers na ito na iyong karapatan nila, hindi naman iyan limitless. Sana kung ano iyong nagba-bind sa traditional media, iyon din iyong mag-bind sa kanila.
Q: Opo… Ma’am, ito po iyong huling tanong namin bago iyong inyong parting message sa ating mga tagapakinig. Dapat iyong pakinggan iyong mga legitimate, hindi iyong mga blogger ang paniwalaan nila.
Ma’am, ano naman po iyong inyong reaksyon sa kampanya ng gobyerno pagdating sa pinagbabawal na gamot, lalo na at marami nang nananawagan na sana itigil na itong mga nangyayaring patayan?
VP LENI: Tayo, Bombo Bobby, very supportive sana tayo sa kampanya kasi tingin natin talagang medyo malaki iyong problema natin sa ilegal na droga. Kaya sa akin… iyong sa akin, sang-ayon tayo na bigyan ito ng focus ng gobyerno, kasi nga ang problema ay napakalaki.
Pero ang reklamo lang natin iyong paraan para gawin ito. Parang marami kasing mga kawani ng pamahalaan na parang inaabuso iyong ibinibigay sa kanila na kapangyarihan. Sa atin, ito iyong nakakabahala. Marami nang namamatay. Parang hindi nire-recognize iyong rule of law, hindi na mahalaga iyong due process. Tingin ko mali ito, kasi oras na i-disregard natin itong lahat, iyong pang-aabuso talagang magreresulta sa mga hindi kanais-nais na bagay.
Iyong sa atin, 100 percent iyong ating suporta sa kampanya, pero ayusin. Sa akin, iyong pag-aayos kasi, hindi puwedeng nasa kamay ng ilang tao lamang iyong pagdedesisyon kung ikaw ay nagkakamali o hindi, kasi mayroon tayong institusyon para magdesisyon diyan. So ayusin natin iyong ating justice system.
Pero hindi gustong sabihin na dahil maraming problema iyong ating justice system, ilalagay na sa kamay ng kung sino lang iyong pagpatay, ilalagay sa kamay ng kahit sino man iyong pagdesisyon kung ano iyong gagawin. Kasi mayroon tayong batas.
Ang nakakatakot kasi nito, Bombo Bobby, kapag hindi natin sinunod iyong batas, magke-create ito ng parang… parang lawlessness sa ating lipunan, na nakakatakot, kasi baka dumating iyong panahon na hindi na natin makontrol iyan.
Q: Opo, tama po kayo, Ma’am Leni, ano?
Ma’am, ipagpaumanhin po ninyo kasi nakuha namin iyong ilang oras ninyo, kasi gusto lang namin kayong ma-interview. Parting message po ninyo sa ating mga tagapakinig dito sa region na ito, eastern Cordillera, through Bombo Radyo-Cauayan, Ma’am, go ahead po.
VP LENI: Salamat, Bombo Bobby, sa pamilya po ng Bombo Radyo dito sa Cordillera, dito sa Nueva Vizcaya. Maraming, maraming salamat po sa pagkakataon na ibinigay sa amin ngayong umaga para po makasama namin kayo dito sa napakaganda ninyong lalawigan.
Ito naman po, bahagi ng ating trabaho na ikutin iyong iba’t ibang lalawigan sa ating bansa, para makita kung paano tayo mas lalong makatulong.
Sa mga tagarito po sa Nueva Vizcaya, salamat po sa mainit ninyong pagtanggap. Gaya po ng sabi ko kanina, kahapon nasa Villaverde po kami, ngayon nasa Solano, at sana po magkaroon ng marami pang pagkakataon na makabalik po kami.
Sa uulitin po, Bombo Bobby. Salamat po sa inyo, at salamat po sa lahat na nakikinig sa atin ngayong umaga.
Q: Maraming salamat po, Ma’am, at magandang umaga!
VP LENI: Magandang umaga po.
– 30 –

Comments(0)

    Leave a Comment